ఎందుకంటే మనం తెలుగు వాళ్ళం కదా!

ఛాదస్తపు ఛందస్సుల  నుంచి

అలంకారాల ఆర్భాటం నుంచి

సరళ తెలుగుని సామాన్యుడికి అందించినా

ఇంకా తెలుగు మనకి అర్ధంకాని బ్రహ్మాండ పదార్థమే

ఎందుకంటే మనం తెలుగు వాళ్ళం కదా!

అమ్మా అని పిలిపించు కోవాలంటే నామోషి

అమ్మా అని పిలవాలంటే  అవమానం

తెలుగులో మాట్లాడాలంటే అనాగరికం

తెలుగు వినడం సంస్కార హీనం

ఎందుకంటే మనం తెలుగు వాళ్ళం కదా!

అభివృద్ధి చెందిన దేశాలు, సాధించిన విజయాలకు పునాది మాతృభాష

అని గొంతు చించుకొని అరుస్తున్నా మనకు వినిపించదు ఆ ఘోష

పెరటు చెట్టు వైద్యానికి పనికి రాని వైనం

అదే అందంగా అలంకరించి అమెజాన్ లో అమ్మేస్తే ఎగబడి కొనే తత్వం

ఎందుకంటే మనం తెలుగు వాళ్ళం కదా!

తెలుగుని ప్రోత్సహించడం, ప్రాంతీయ భావాలు ఎగదొయ్యడమా

ఆంగ్లాన్ని అనుసరించడం ప్రపంచీకరణమా

అమ్మనుడిలో కమ్మగా మాట్లాడడం తెలియనితనం

వచ్చీ రాని ఆంగ్లంలో మాట్లాడడం హుందాతనం

ఎందుకంటే మనం తెలుగు వాళ్ళం కదా!

పక్క రాష్ట్రాలు భాష కోసం ప్రాణాలిస్తుంటే

మనం, పిల్లలు మాతృభాషలో మాట్లాడితే మందలిస్తున్నాం

ఉన్నత విద్యలో సరే సరి,

ప్రాధమిక విద్యలో కూడా మాతృభాష మూలాలను తీసేస్తున్నాం

ఎందుకంటే మనం తెలుగు వాళ్ళం కదా!

ఇకనైనా కళ్ళు తెరిచి

అమ్మనుడిని అక్కున చేర్చి

దేశ భాషలందు తెలుగు లెస్స అని

తెలుగు పునర్వైభవాన్ని  తీసుకొద్దాం

నిజమైన తెలుగు బిడ్డలమని ఇప్పుడయినా నిరూపిద్దాం

తెలుగు వారందరికీ

" తెలుగు భాషాదినోత్సవ శుభాకాంక్షలు "

స్వతంత్రం

కొన్ని వందల ప్రాణాల త్యాగఫలం , కొన్ని లక్షల  మంది కష్టాల అనుభవం నుంచి వచ్చిన సుమఫలం

వాదనలు ఎన్ని ఉన్నా వేదనలు మాత్రం పడ్డాం

అతివాదులయినా మితవాదులయినా పోరాట గమ్యం ఒక్కటే

సాధించాం అందరి సాకారం తో స్వతంత్రం

ఇదేనా నాటి వారు కలలు కన్న స్వతంత్రం , కోరుకున్న స్వరాజ్యం

ఒకడిని ఒకడు దోచుకోవడం , తిండి పెట్టే వాడే తిండి లేక చచ్చిపోవడం (రైతులు , వృద్ధులయిన తల్లిదండ్రులు), అధికారం ఉన్న వాడే అడ్డగోలుగా వ్యవహరించడం , ఇది కాదు కదా ఆ మహనీయుల త్యాగాలకు ప్రతిఫలం 

ఎక్కడ చూసినా అవినీతి, అక్రమము,స్వార్థం ,రాక్షస రాజ్యం , అహం ,అధికార దాహం, అరాచకం.

ఇది కాదు కదా వాళ్ళు కోరుకున్న స్వరాజ్యం

సొంత లాభం కొంత మరిచి , పాటుపడవోయి పక్కవాడి కోసం అన్నది మరిచి మన తరతరాల కోసం ఎదుట వారి ఆయువు సైతం ఆశగా దోచేస్తున్నారు 

కాదు స్వాతంత్ర్యం అంటే ఒక్కడే ఎదగడం , నలుగురు నవ్వుతూ ఏ కష్టం లేకుండా బ్రతకడం

మీ ఆశలకు అంతులేదా , మీ తరతరాల దోపిడీకి ఇంకా ముగింపే ఉండదా

ఇది కాదురా నిజమైన స్వతంత్రం

ఉదయం లెగిచిన దగ్గర నుంచి రాత్రి పడుకునే వరకు మనకు ఏది అసౌకర్యం అనిపిస్తుందో అది ఎదుటి వారికి మనము చెయ్యకుండా ఉంటే ఈ సమాజం శాంతి , సౌభ్రాతృత్వలతో నిండి పోతుంది

ఇదే ఇదే నిజమైన స్వతంత్రం

మహనీయులు కలలు కన్న మహోన్నత స్వరాజ్యం

భావితరాలకు మనం అందించే అతి పెద్ద బహుమానం